Fotos
Coğrafiyaçı gənc alimlər Beynəlxalq Yer Gününü Respublika Uşaq Gənclər İnkişaf Mərkəzində qeyd ediblər
Apr 24 , 2018 | 08:19 / Mühim hadisələr
Oxunma ( 347 )

23 aprel 2018-ci il tarixində AMEA akademik H.Ə.Əliyev adına Coğrafiya İnstitutunun Gənc Alim və Mütəxəssislər Şurasının təşkilatçılığı ilə Beynəlxalq Yer Gününə həsr olunmuş növbəti seminar-məşğələ Respublika Uşaq Gənclər İnkişaf Mərkəzinin “Gənc Diyarşünaslıq” dərnəyinin üzvləri ilə keçirilib. Tədbirin əsas məqsədi ətraf mühiti çirkləndirən, insan sağlamlığına mənfi təsir göstərən əsas mənbələr haqqında məktəbliləri məlumatlandırmaq, ətraf mühitin çirklənməsi nəticəsində meydana gələn ekoloji problemlərin həlli yollarını və onların qarşısının alınması üçün vacib olan tədbirləri şagirdlərə izah etmək, eləcə də gələcək peşə seçimlərində şagirdlərə istiqamət verməkdir. Ənənəyə uyğun olaraq, tədbir AMEA-nın elmi-tədqiqat müəssisələrinin fəaliyyətini əks etdirən sərginin Coğrafiya İnstitutuna aid bölməsi ilə tanışlıqdan başlayıb. Sonra şagirdlər İnstitutun Xəritəçilik və Coğrafi İnformasiya şöbəsində olublar. CİS mütəxəssisi Yaşar Nəsibov şöbənin fəaliyyəti haqqında ətraflı məlumat verib, sürətli kompüterlər, plotterlər və professional skanerləri nümayiş etdirib, şagirdlərə coğrafi informasiya texnologiyalarının köməyi ilə müxtəlif məzmunlu rəqəmsal xəritələrin tərtib və çap edilməsi prosesini izah edib. Tədbir İnstitutun konfrans zalında davam etdirilib. Şuranın sədri, c.ü.f.d. Samirə Ələkbərova giriş sözü ilə iştirakçıları salamladıqdan sonra şuranın fəaliyyəti, eləcə də Beynəlxalq Yer Gününün əhəmiyyəti və tarixi haqqında ətraflı məlumat verib. Coğrafiya İnstitutunun elmi işlər üzrə direktor müavini, dosent Məhərrəm Həsənov seminar-məşğələnin mövzusu ətrafında geniş çıxış edərək məktəblilərə ətraf mühitin qorunmasının vacibliyindən söhbət açıb. C.ü.f.d. Samirə Ələkbərova “Ekologiya və ətraf mühitin mühafizəsi” mövzusunda təqdimatla çıxış edib, şagirdlərı maraqlandıran sualları cavablandırıb. Respublika Uşaq Gənlər İnkişaf Mərkəzinin direktor müavini, b.ü.f.d. Lalə Dadaşova tədbirin yüksək səviyyədə təşkilinə görə, başda akademik Ramiz Məmmədov olmaqla, Coğrafiya İnstitutunun kollektivinə öz təşəkkürünü bildirib. Tədbirin sonunda Mərkəzin mütəxəssisi Nəzakət İbrahimovanın rəhbərlik etdiyi “Gənc Diyarşünaslıq” dərnəyinin üzvləri Xətai rayonu 245 saylı orta məktəbinin şagirdləri ilə birlikdə Beynəlxalq Yer Gününə həsr etdikləri səhnəciyi nümayiş etdiriblər. Tamaşa seminar iştirakçıları tərəfindən böyük maraqla qarşılanib.

Şurаnın fəaliyyətinin əsаs məqsədi AMEA üzrə fəaliyyət göstərən gənclərin еlmi pоtеnsiаlının аrtırılmаsı, müxtəlif təşəbbüslərinin stimullаşdırılmаsı, elmə axının təmin olunması, asudə vaxtlarının səmərəli keçirilməsinin təşkili,əldə еtdikləri еlmi yеniliklərin müxtəlif kütləvi informasiya vasitələrində işıqlandırılması, onlara mеtоdiki, infоrmаsiyа yаrdımının göstərilməsi və s. həyata keçirlməsindən ibarətdir. Şurаnın fəaliyyətinə həmçinin, elmin respublika üzrə təbliğ edilməsi və Azərbaycan elminin dünya elminə inteqrasiyasının sürətləndirilməsi məsələləri daxildir.