Fotos
AMEA Elmi Müəssisələrinin Direktorları Şurasının növbəti iclası keçirilib
Dek 03 , 2018 | 02:00 / Mühüm hadisələr
Oxunma ( 2963 )

Dekabrın 3-də AMEA Elmi Müəssisələrinin Direktorları Şurasının növbəti iclası keçirilib. Tədbirdə AMEA-nın prezidenti, vitse-prezidentləri, akademik-katibi, elmi bölmələrin akademik-katibləri, elmi müəssisələrin direktorları, Rəyasət Heyətinin idarə rəisləri və digər məsul əməkdaşları iştirak ediblər.

Əvvəlcə AMEA-nın prezidenti, akademik Akif Əlizadə tədbir iştirakçılarını gündəlikdəki məsələlərlə tanış edib.

İclasda müzakirəyə çıxarılan ilk məsələ AMEA Ümumi Yığıncağının 8 iyun 2018-ci il tarixli qərarının icrası haqqında olub. A.Əlizadə bildirib ki, akademiyada qarşıya qoyulan vəzifələr və müəyyən edilən prioritetlər rəhbər tutularaq bir sıra əhəmiyyətli işlər görülüb, elmin inkişafı üçün mühüm tədbirlər həyata keçirilib.

Alim rəhbərlik etdiyi qurumda irihəcmli elmi layihələrdə fəal iştirak, beynəlxalq əməkdaşlığın genişləndirilməsi, fundamental elmi tədqiqatların aparılması ilə bağlı kompleks tədbirlərin görülməsinin vacibliyini vurğulayıb. O, AMEA-nın müvafiq elmi müəssisələrində nanotexnologiyalar, alternativ enerji, kənd təsərrüfatı problemləri, elmin informasiya təminatının gücləndirilməsi, e-elmin formalaşması və digər istiqamətlərdə ciddi tədqiqatların aparılmasına dair müvafiq tapşırıqlar verib.

A.Əlizadə rəhbərlik etdiyi qurumun elmi müəssisələrinin gələcəyi ilə bağlı seminar və müzakirələrin təşkili haqqında da fikirlərini bölüşüb: “Hər bir elmi bölmənin nəzdində fəaliyyət göstərən institut və təşkilat mütəmadi olaraq gördüyü işlərlə bağlı hesabat verməli, elmi sessiyalar keçirməli, müəssisənin perspektivlərinin müəyyənləşdirilməsi ilə bağlı konkret qərarlar qəbul etməlidir.”

Doktorantura və dissertanturada təhsilin təkmilləşdirilməsinə yeni yanaşma haqqında çıxış edən AMEA rəhbəri qeyd edib ki, dissertasiya mövzuları seçilərkən prioritet elmi istiqamətlərə diqqət yetirmək və dünya elminin tələblərini nəzərə almaq olduqca vacibdir. Hər bir elmi rəhbər gənc tədqiqatçılarla fərdi şəkildə işləməli, onların elmi potensialını müəyyənləşdirməyi bacarmalıdır.

İclasda, həmçinin baza kafedralarının fəaliyyəti müzakirə edilib. A.Əlizadə AMEA-nın elm və təhsilin inteqrasiyası istiqamətində mühüm işlər gördüyünü vurğulayaraq bildirib ki, hazırda akademiyanın institutlarında müxtəlif universitetlərin 16 baza kafedrası fəaliyyət göstərir. Qeyd edib ki, elmi müəssisələrdə təcrübə mərkəzlərinin təşkili nəticəsində ali təhsil müəssisələrinin tələbələri yüksək səviyyədə bilik və bacarıqlar əldə edirlər. AMEA prezidenti elmi müəssisələrdə baza kafedralarının sayının artırılması və onların fəaliyyətinə dair normativ hüquqi bazanın formalaşdırılmasının zəruriliyini vurğulayıb.

Akademik A.Əlizadə bildirib ki, AMEA-nın çoxşaxəli islahatlarından biri də alimlərin elmi, elmi-təşkilati və elmi-pedaqoji fəaliyyətinin qiymətləndirilməsi, onların əməyinin stimullaşdırılmasıdır. O, ötən il bir qrup alimə yüksək elmi nəticələrinə görə “AMEA-nın professoru” elmi adının verildiyini diqqətə çatdırıb. Həmin alimlərin elmi-tədqiqat işlərinə, elmi kadrların hazırlanması prosesinə daha fəal cəlb edilməsinin vacibliyini vurğulayan alim bu məsələ ilə bağlı AMEA-nın elmi bölmələrinin rəhbərlərinə müvafiq tapşırıqlar verib.

Daha sonra AMEA-nın akademik-katibi, akademik Rasim Əliquliyev çıxış edərək AMEA-nın elmi müəssisələrinin saytlarının monitorinqinin nəticələrini təqdim edib. Alim monitorinqə cəlb olunmuş 55 elmi müəssisə və təşkilatdan 48-nin veb-saytının olduğunu diqqətə çatdırıb. Bildirib ki, 2018-ci ilin fevral-iyun aylarını əhatə edən monitorinqə İnformasiya Texnologiyaları İnstitutunun mütəxəssislərindən ibarət qrup cəlb olunmuşdur: “Monitorinq çərçivəsində akademiyanım elmi müəssisələrinə məxsus bir sıra veb-saytlar dizayn, proqram təminatı, xəbərlərin dinamikası, informasiyanın dolğunluğu və aktuallığı da daxil olmaqla, 16 bənddən ibarət meyarlara əsasən təhlil edilmiş, kompleks qiymətləndirilmə aparılmışdır”.

R.Əliquliyev, həmçinin AMEA-da mühasibatlıq işinin İKT təminatı haqqında məruzə edib. Bildirib ki, ölkəmizdə maliyyə siyasətini həyata keçirən və dövlət maliyyəsinin idarə olunmasını təşkil edən mərkəzi icra hakimiyyəti orqanı AR Maliyyə Nazirliyi ölkədə dövlət büdcəsindən maliyyələşən müəssisə və təşkilatların fəaliyyətinin avtomatlaşdırılması istiqamətində bir neçə layihəni həyata keçirməkdədir. Bu layihələrdən biri də müəssisələrin mühasibat uçotu və maliyyə fəaliyyətinin avtomatlaşdırılmasını nəzərdə tutan bir sistemdir. Alim qeyd edib ki, 2015-ci ildə nazirlik bu sahədə böyük təcrübəyə malik bir şirkətlə müqavilə bağlayaraq geniş imkanlara malik infrastrukturun qurulması işlərinə başlayıb.

Maliyyə Nazirliyində dövlət büdcəsindən maliyyələşən təşkilatların mühasibat uçotuna dair məlumatların mərkəzi serverinin yerləşdiyi Data Mərkəzin fəaliyyət göstərdiyini vurğulayan R.Əliquliyev burada ümumilikdə müəssisələrin fəaliyyətinin avtomatlaşdırılmasına xidmət edən, eləcə də mühasibatlıq sistemində toplanmış məlumatların analitik emalını həyata keçirən 14 moduldan ibarət proqram təminatının təqdim olunduğunu diqqətə çatdırıb.

Ölkəmizdə yüzlərlə təşkilatın bu sistemə qoşulduğunu deyən alim 2016-cı ildən başlayaraq AMEA-nın 35 elmi müəssisə və təşkilatının bu sistemdən istifadə etdiyini, 12 təşkilatda işə qoşulma prosesinin həyata keçirildiyini deyib.

Alim ölkəmizdə elektron hökumətin seqmenti olan elektron maliyyənin yüksək səviyyədə həyata keçirildiyini, Azərbaycanda dünya standartlarına cavab verən milli İKT məhsulunun yaradılmasının sevindirici hal olduğunu söyləyib.

İclasda “AMEA-da magistratura təcrübəsi: analiz və gələcəyə baxış” mövzusunda çıxış edən AMEA Rəyasət Heyəti aparatının Elm və təhsil baş idarəsinin rəisi, AMEA-nın müxbir üzvü Əminağa Sadıqov akademiyanın magistraturasına qəbulun dinamikası, 4 il ərzində qəbul olunmuş magistrantların statistikasını diqqətə çatdırıb. O, 2017 və 2018-ci illərdə magistratura pilləsində plan yerləri və keçirilən müsahibənin nəticələri haqqında məlumat verib, eləcə də gələcəkdə görülməsi nəzərdə tutulan işlərdən danışıb.

Tədbirin sonunda müzakirəyə çıxarılan məsələlərlə bağlı geniş fikir mübadiləsi aparılıb, bir sıra təklif və tövsiyələr irəli sürülüb.

Müzakirələrdə akademiklər İradə Hüseynova, Əhliman Əmiraslanov, Nailə Vəlixanlı, Vaqif Fərzəliyev, AMEA-nın müxbir üzvləri Oqtay Qasımov, Qurban Yetirmişli və digərləri iştirak ediblər.

 

Şurаnın fəaliyyətinin əsаs məqsədi AMEA üzrə fəaliyyət göstərən gənclərin еlmi pоtеnsiаlının аrtırılmаsı, müxtəlif təşəbbüslərinin stimullаşdırılmаsı, elmə axının təmin olunması, asudə vaxtlarının səmərəli keçirilməsinin təşkili,əldə еtdikləri еlmi yеniliklərin müxtəlif kütləvi informasiya vasitələrində işıqlandırılması, onlara mеtоdiki, infоrmаsiyа yаrdımının göstərilməsi və s. həyata keçirlməsindən ibarətdir. Şurаnın fəaliyyətinə həmçinin, elmin respublika üzrə təbliğ edilməsi və Azərbaycan elminin dünya elminə inteqrasiyasının sürətləndirilməsi məsələləri daxildir.