İyl 22 , 2019 | 05:01 / Mühüm hadisələr
Azərbaycan Milli Elmlər Akademiyası (AMEA) Genetik Ehtiyatlar İnstitutunda (GEİ) seminar keçirilmişdir.
İlk olaraq, Əsmər Əliyeva tədqiqat sahəsi üzrə “Azərbaycan populyasiyası üçün STR allel tezlikləri databazasının GlobalFiler kiti ilə təkmilləşdirilməsi” mövzusunda təqdimat ilə çıxış etmişdir. O, Nyu York Ştat Universitetinin Məhkəmə Tibbi Ekspertiza Biologiyası fakültəsində təhsil alır. Tədqiqat işini Dr. Arati İyengarın rəhbərliyi altında Nyu York Ştat Polisinin Məhkəmə Ekspertizası laboratoriyası ilə birgə çalışan Şimal Şərqi Regional Məhkəmə Tibbi Ekspertiza İnstitutunun laboratoriyasında aparır.
Sonra GEİ İnsan Genetikası qrupunun elmi işçisi Xaqani Eynullazadə apardığı tədqiqatlar barədə çıxış etmişdir. O, ABŞ-ın Şimali Karolina Universitetində Nobel mükafatı laureatı Professor Aziz Sancarın laboratoriyasında tədqiqat işi aparmış və əsas DNT təmir mexanizmlərindən olan Nucleotide Excision Repair də DDB2 proteinin rolunu öyrənmişdir. O, bildirir ki, bu mexanizmin öyrənilməsi xərçəng xəstəliyinin müalicəsində mühüm əhəmiyyətə malikdir.
Daha sonra GEİ İnsan Genetikası qrupunun elmi işçisi Səbinə Fərhadova çıxış etmişdir. O, 2018-ci ildə AMEA və Fransanın Montpelye Universiteti tərəfindən birgə PhD proqramı üzrə müsabiqənin qalibi olmuş və tədqiqatlarını Montpelye Universitetindən Dr. Robert Feil və AMEA Biologiya və Tibb Elmləri Bölməsinin akademik-katibi Əhliman Əmiraslanovun rəhbərliyi altında həyata keçirir. S.Fərhadova Siçan Embrionik Kök hüceyrələrindən istifadə etməklə İmprintinq Xəstəliklərinin molekulyar analizi mövzusunda dissertasiya işi üzərində tədqiqat aparır.