Azərbaycan Respublikası Prezidenti yanında Gənclər Fondunun dəstəyilə “Mən bir ağac əkmişəm” layihəsi çərçivəsində Bakı Dövlət Universitetinin və Bakı Ali Neft Məktəbinin tələbələri AMEA Botanika İnstitutu və Mərkəzi Nəbatat Bağında oldular. Layihə üzrə növbəti təlim MNB-nın canlı kolleksiyasına eksursiya ilə başladı. MNB-nın elmi işçisi Nərgiz Əliyeva iştirakçılara bağa introduksiya edilmiş müxtəlif bitkilərin (Azərbaycan florasına aid endem və nadir  bitkilər, dərman bitkiləri və s.) təbii yayılma əraziləri, onların əhəmiyyəti, mühafizə problemləri haqqında geniş məlumat verdi.

Təlimlər AMEA Botanika İnstitutunun laboratoriyalarında davam etdirildi. İnstitutun Bitki ehtiyatları şöbəsinin əməkdaşı, b.e.d. Lətafət Mustafayeva iştirakçılara laboratoriyada dərman bitkiləri ilə aparılan elmi-tədqiqat işləri haqqında ümumi məlumat verərək bioloji fəal maddələrin rolu, bitki materiallarının analizə hazırlanması, təcrübə aparmaq üçün istifadə olunan avadanlıq və aparatlardan istifadə qaydaları ilə tanış etdi.

Doktorant Şəhla  Mirzəyeva Herbari Fondunda saxlanılan dəyərli tip nümunələri, onların saxlanılma şəraiti və rəqəmsallaşdırılaraq Avropa məlumat bazasına daxil edilməsi prossesini izah etdi. Gənc mütəxəssis Xanım Həsənova muzeydə nümayiş olunan “Azərbaycanın yaşıl xəzinəsi” adlı sərgi haqqında ətraflı məlumat verdi.