AMEA Botanika İnstitutunda ABŞ-ın aparıcı Botanika bağlarının təmsil olunduğu Botanika Bağları Cəmiyyətinin (BBC) nümayəndələrinin iştirakı ilə təqdimat seminar keçirilib. Seminarı İnstitutun direktoru, akademik Validə Əlizadə açaraq təşkilatlararası  imzalanmış əməkdaşlıq memorandumundan söz açıb. Qeyd edib ki, bu memorandum gələcəkdə təcrübə mübadiləsi və müştərək layihələr üzərində işləmək üçün perspektivlər açır.  

Seminarda BBC-in baş kordinatoru Dr. Andrey Bunting, Botanika bağlarının aparıcı kuratorları Peter Zale (Longwood Bağları), Vincent Marrocco (Morris Arboretum), Phil Douglas (Çikaqo Botanika Bağı), Matt Lobdell (Morris Arboretum Bağı), Henrik Sjoman (Gothenburg Botanika Bağları) təmsil etdikləri təşkilatların  fəaliyyətindən  bəhs edən məruzələr təqdim ediblər. Sonda əməkdaşları maraqlandıran suallar ətrafında qarşılıqlı fikir mübadiləsi aparılıb.

Səfər müddətində qonaqlar Azərbaycanın yabanı florasının öyrənilməsi məqsədilə Zaqatala, Qax, Lerik və Lənkəran ərazilərində müştərək tədqiqatlar aparıblar. Toplanan bitki və toxum nümunələri bioloji müxtəlifliyin mühafizəsi məqsədilə İnstitutun Toxum bankına təhvil verilib.