Fotos
Sabunçu məktəbliləri AMEA Coğrafiya İnstitutuna ekskursiya ediblər
Noy 01 , 2017 | 03:10 / ELMİN TƏBLİĞİ
Oxunma ( 2521 )

AMEA akad. H.Ə. Əliyev adına Coğrafiya İnstitutun Gənc Alim və Mütəxəssislər Şurasının (GAMŞ) oktyabrın 31-də Sabunçu rayonu Xavər Vəliyev adına 75 saylı orta məktəb şagirdləri üçün seminar-məşğələ keçirilib. Coğrafiya İnstitutun Gənc Alim və Mütəxəssislər Şurasının Bakı şəhəri orta məktəb şagird və müəllimləri üçün “Azərbaycanı tanıyaq” devizi altında keçirdiyi növbəti tədbirlərdən biri idi. Onların təşkilində əsas məqsəd Azərbaycan haqqında şagirdlərə daha geniş və hərtərəfli məlumat vermək, gənclərin coğrafiya elminə olan marağını artırmaq, gələcək peşə seçimlərində onlara dəstək olmaqdan ibarətdir.

Tədbir AMEA-nın elmi-tədqiqat müəssisələrinin fəaliyyətini əks etdirən sərginin Coğrafiya İnstitutuna aid bölməsi ilə tanışlıqdan başlayıb.

GAMŞ sədri böyük elmi işçi, c.ü.f.d. S.O. Ələkbərova şagirdlərə Coğrafiya İnstitutunun tarixi, tədqiqat sahələri, görkəmli alimləri, nailiyyətləri və s. haqqında məlumat vedbi.

Sonra iştirakçılar “Xəritəçilik və Coğrafi İnformasiya” şöbəsində oldular, şöbənin əməkdaşları onlara CİS texnologiyaları vasitəsilə müxtəlif məzmunlu rəqəmsal xəritələrin tərtib və çap edilməsi prosesini izah ediblər. İnstitutun konfrans zalında davam edən seminar-məşğələdə Şuranın sədri c.ü.f.d. S.O.Ələkbərova tədbirin keçirilməsinin əhəmiyyətindən danışdı. Bildirilib ki, Azərbaycanda həyata keçirilən dövlət gənclər siyasətinin prioritet istiqaməti kimi gənc nəslin Vətənə, xalqın milli mənəvi dəyərlərinə hörmət və məhəbbət ruhunda tərbiyə olunması seminar-məşğələlərin əsas məqsədlərindən biridir. O həmçinin qeyd edib ki, bu məşğələlər Azərbaycan regionlarının unikal təbiət möcüzələri, tarixi-mədəni abidələri haqqında müxtəlif videoçarxların və İnstitutumuzun alimləri tərəfindən müxtəlif dövrlərdə çəkilmiş şəkillərin nümayiş etdirilməsi, müasir texnologiyalarla aparılan tədqiqatların nəticələri haqqında ətraflı məlumatların şərh olunması kimi əhəmiyyətli mövzuları əhatə edir. Daha sonra İnstitutun “Demoqrafiya və əhali coğrafiyası” şöbəsinin böyük elmi işçisi, c.ü.f.d. Etibar Bədəlov “Abşeronun yurd yaddaşı” adlı geniş təqdimatla çıxış edib. Abşeronu dərindən bilən, onu qarış-qarış gəzib araşdıran alim şagirdlərə onun təbiəti, tarixi-mədəni abidələri, məskunlaşması, ərazidəki mövcud ekoloji problemlər və onların aradan qaldırılması yolları haqqında ətraflı məlumat verib. O, gənclərə anlatmağa çalışdı ki, Vətəni sevmək üçün onu yaxşı tanımalı, öyrənməli, başqalarına da tanıtmalı, inkişafı, çiçəklənməsi naminə öz əməyini əsirgəməməlisən. Çıxışını bitirərkən görüş iştirakçılarının suallarını cavablandıran məruzəçi növbəti görüşə qədər Zabrat qəsəbəsinin tarixi-mədəni abidələrinin fotoşəkillərini çəkib toplamaqlarını şagirdlərə tapşırıb. Tədbirin sonunda İnstitutun elmi katibi, c.ü.f.d. Zərnurə Həmidova müdiriyyət adından məktəbə Coğrafiya İnstitutunun nəşrlərini məktəbə hədiyyə edib.

 

Şurаnın fəaliyyətinin əsаs məqsədi AMEA üzrə fəaliyyət göstərən gənclərin еlmi pоtеnsiаlının аrtırılmаsı, müxtəlif təşəbbüslərinin stimullаşdırılmаsı, elmə axının təmin olunması, asudə vaxtlarının səmərəli keçirilməsinin təşkili,əldə еtdikləri еlmi yеniliklərin müxtəlif kütləvi informasiya vasitələrində işıqlandırılması, onlara mеtоdiki, infоrmаsiyа yаrdımının göstərilməsi və s. həyata keçirlməsindən ibarətdir. Şurаnın fəaliyyətinə həmçinin, elmin respublika üzrə təbliğ edilməsi və Azərbaycan elminin dünya elminə inteqrasiyasının sürətləndirilməsi məsələləri daxildir.