Azərbaycan Milli Elmlər Akademiyası Genetik Ehtiyatlar İnstitutunun Virusologiya qrupunun rəhbəri biologiya üzrə fəlsəfə doktoru Eldar Mustafayev 6 ay müddətində Amerikada ezamiyyətdə olmuşdur.

O, ABŞ-ın Azərbaycandakı Səfirliyinin 2018-2019 cu il üçün elan etdiyi Fulbright Elmi Tədqiqat proqramının qalibi olmuş və Nyu Yorkda yerləşən Kornell Universitetində tədqiqat aparmışdır. Tədqiqat işləri proqram çərçivəsində universitetin “Plant Pathology and Plant-Microbe Biology” departamentində dünya şöhrətli alim, professor Mark Fuksun rəhbərliyi altında “Azərbaycanda üzüm və meyvə bitkilərdə yayılmış virus populyasiyalarının xarakteristikası və genetik müxtəlifliyi” mövzusunda yerinə yetirilmişdir. Ezamiyyət müddətində Azərbaycan və eyni zamanda Nyu Yorkun müxtəlif bölgələrindən toplanmış bitki nümunələri tədqiq edilmişdir. İşin əsas məqsədi meyvə və üzüm bağlarında yayılmış virus mənşəli xəstəlikləri dərindən tədqiq etməklə bağları və eləcə də istehsal edilən məhsulu yaranmış xəstəliyin mənfi təsirindən mühafizə etməkdir.