AMEA-da mənzil bölgüsü tam şəffaflıqla aparılıb
İyn 07 , 2019 | 11:48 /
Oxunma ( 119 )

Sərdar Əliyev

AMEA İşlər idarəsi müdirinin müavini, Mənzil komissiyasının katibi

 

Bir neçə gündür ki, ölkənin bəzi xəbər saytlarında, eləcə də sosial şəbəkələrdə AMEA-nın yataqxanasında məskunlaşan alimlər üçün nəzərdə tutulmuş yeni tikilidə mənzillərin bölgüsü məsələsi ilə bağlı müzakirələr yenidən gündəmə gəlib. Baxmayaraq ki, mənzil bölgüsünün sosial ədalət prinsiplərinə riayət olunmaqla və tam şəffaflıqla aparılması haqqında akademiya tərəfindən dəfələrlə sübut və dəlillərə əsaslanmış açıqlamalar verilib.

Məlumat üçün bir daha qeyd edək ki, AMEA ilə “Evrostroy-S” MMC arasında Azərbaycan Milli Elmlər Akademiyasının Bakı şəhəri, Yasamal rayonu, Şərifzadə küçəsi,12 ünvanında yerləşən yataqxanasının ərazisində, yataqxanada yaşayan AMEA əməkdaşlarının mənzil şəraitinin yaxşılaşdırılması məqsədilə yeni yaşayış evlərinin tikintisi barədə 14 noyabr 2012-ci il tarixdə müqavilə bağlanıb.

“Evrostroy-S” MMC ilə aparılan çoxsaylı görüşlər, gərgin söhbətlər və nəticədə tərəfimizdən respublika prokurorluğuna edilən müraciət sayəsində indiyədək “Evrostroy-S” MMC tərəfindən AMEA-ya yataqxana ərazisində inşa edilən binadan 58 mənzil (onlardan 4 mənzil mansard hissəsindən) ayrılıb. “Evrostroy-S” MMC yataqxana ərazisində inşa edilən binalarda boş mənzillər qalmadığını bildirərək sonralar Bakı şəhərinin kənar hissələrindəki yaşayış məntəqələrində və Bakı şəhərinin digər ünvanlarında yeni inşa edilən binalardan da mənzillər ayırıb.

Araşdırma zamanı məlum olub ki, yataqxanada qeydiyyatda olub yaşayan və adına otaq olub yaşamayan 107 ailə vardır. Onlardan 71 ailə AMEA-da işləyir, 36 ailə isə AMEA-da çalışmayanlardır. Bunlardan əlavə, AMEA-da işləyən 48 əməkdaşın ailəsinin də (onlardan 34-ü fəlsəfə doktoru, 1-i elmlər doktorudur) 20 ildən artıq müddətdir ki, yataqxanada qeydiyyatda olduğu, lakin boş otaq olmadığına görə orada yaşamadıqları müəyyən edilib.

Yataqxanada yaşayan 71 AMEA əməkdaşından 45 ailənin və yataqxanada qeydiyyatı olub yaşamayan, elmi dərəcəsi olan 16 əməkdaşın mənzil almağa hüququ olduğu müəyyən edilib və onlara mənzil ayrılması barədə qərar qəbul edilib.

“Evrostroy-S” MMC tərəfindən Şərifzadə küçəsi, 12 ünvanında inşa edilən binadan ayrılmış mənzillərin azlığı nəzərə alınaraq, əsasən elmi dərəcəsi olan əməkdaşlara Şərifzadə küçəsi, 12 ünvanında inşa edilən binadan, elmi dərəcəsi olmayan əməkdaşlara isə kənardakı ünvanlardan mənzillər verilib. AMEA-nın inzibati binasında 06.10.2017-ci il tarixdə keçirilən yığıncaqda mənzil ayrılmış 61 nəfərə mənzillərin sənədləri və  açarları təqdim olunub.

Bundan sonra Şərifzadə küçəsindən kənarda mənzil ayrılmış əməkdaşlardan 5-i uzaqlığı əsas götürərək verilən mənzillərdən imtina edib.

Komissiyanın növbəti iclaslarında isə yataqxanada yaşayan və qeydiyyatı olub yaşamayan 12 AMEA əməkdaşına da, o cümlədən qeydiyyatda olub yaşamayan 1  elmlər doktoruna və AMEA-da 0,5 ştatla işləyən, elmi dərəcəsi olan 5 ailəyə mənzil ayrılıb. “Evrostroy-S” MMC tərəfindən ayrılmış yeni mənzillərin əməkdaşlara verilməsi davam etdirilir.

Müraciətlərin və şikayətlərin çoxluğunu nəzərə alaraq, 2017-ci ilin oktyabrından 2018-ci ilin iyul ayına qədər hər həftənin çərşənbə axşamı komissiya tərəfindən qəbul keçirilib. Müraciət edənlərə ətraflı izahatlar və mənzil almayanlara səbəbləri barədə geniş məlumat verilib.

Hazırda şikayət edənlər, yəni mənzillə təmin olunmadıqlarına görə narazı qalanlar aşağıda qeyd edilənlərdir:

- Akademiyada işləyən, yataqxanada yaşadıqları müddətdə adlarına Bakı şəhərində, digər ünvanlarda mənzil olduğuna görə yataqxanada yaşamaq hüququnu itirənlər (11 ailə);

- Akademiyada işləməyən, yataqxanada qeydiyyatı və otağı olan, lakin yataqxanada yaşamayan ailələr (12 ailə);

- AMEA-da 0,5 ştat vahidi ilə işləyən, yataqxanada qeydiyyatı və otağı olan, lakin yataqxanada yaşamayan ailələr (2 ailə);

- AMEA-da işləmiş, mənzil məsələsinə baxılan zaman AMEA-da işləməyən ailələr (21 ailə);

- AMEA-da heç vaxt işləməmiş, yataqxanada yaşayan ailələr (4 ailə);

- Yataqxanada yaşayan, Bakı şəhərində, digər ünvanda yaşayış sahəsinə hüququ olanlar (2 ailə);

- Mənzil ayrılmış, lakin uzaqda yerləşdiyini əsas götürərək mənzildən imtina edənlər (5 ailə);

- AMEA-da 0,5 ştatla işləmiş, hazırda işləməyən, mənzil məsələsi barədə məhkəmədə iddia qaldıran (1 ailə).

Mətbuatda adları qeyd edilən rəhbər işçilər tərəfindən mənzillərin alınması məsələsinə gəlincə isə bildiririk ki, Azərbaycan Milli Elmlər Akademiyası ilə “Evrostroy-S” MMC arasında bağlanmış müqavilənin 2.1.1. bəndində qeyd edilib ki, “Binanın yaşayış və qeyri-yaşayış sahələrinin mülkiyyəti və onların satış hüququ (Azərbaycan Milli Elmlər Akademiyasına məxsus yuxarıda qeyd olunan ünvanda yerləşən yataqxanada yaşayan Akademiya əməkdaşları üçün ödənişsiz əsaslarla ayrılmış bir blokun mənzillərindən başqa) “Podratçı”ya məxsusdur”.

Həmin müqavilənin 2.1.3. bəndində qeyd edilib ki, “Podratçı” güzəştli satış üçün tərəflər arasında müvafiq razılaşmaya əsasən göstərilən torpaq sahəsində inşa olunacaq mənzillərdən (Azərbaycan Milli Elmlər Akademiyasına  məxsus yuxarıda qeyd olunan ünvanda yerləşən yataqxanada yaşayan Akademiya əməkdaşları üçün ödənişsiz əsaslarla ayrılmış bir blokun mənzillərindən başqa) AMEA-nın mənzil hüququ olan əməkdaşlarına onların istəyinə uyğun olaraq əlavə sahə ayırır.

Odur ki, AMEA-nın yataqxana məsələsi ilə əlaqəsi olmayan xeyli sayda əməkdaşları, o cümlədən də AMEA-nın bəzi rəhbər işçiləri öz maliyyə vəsaitləri hesabına, alqı-satqı yolu ilə həmin binalardan mənzillər alıblar. Lakin qeyd edilən müqaviləyə əsasən “Evrostroy-S” MMC tərəfindən həmin binalardan AMEA-ya ayrılacaq mənzillərin sayı az nəzərdə tutulduğundan AMEA rəhbərliyi ilə “Evrostroy-S” MMC arasında gərginlik yarandığına görə AMEA-nın ərizədə adları qeyd edilən rəhbər işçiləri alqı-satqı qaydasında aldıqları mənzilləri bir neçə il qabaq geri qaytarıblar və ödədikləri maliyyə vəsaitini rəsmi olaraq geri alıblar. O vaxtdan mənzillər həmin əməkdaşların adlarından çıxarılıb və hazırda onların adlarına “Evrostroy-S” MMC tərəfindən inşa edilən binalarda heç bir mənzil yoxdur.

AMEA Rəyasət Heyətinin müvafiq qərarlarına əsasən yataqxanada boşalan otaqlara AMEA-nın magistrləri və doktorantları təhsil aldıqları müddətə və kirayələrdə yaşayan digər AMEA əməkdaşları isə işlədikləri müddətə, qeydiyyata alınmadan yerləşdirilirlər. Onlarla qanunvericiliyə müvafiq qaydada bir il müddətinə müqavilə bağlanır.

 

Şurаnın fəaliyyətinin əsаs məqsədi AMEA üzrə fəaliyyət göstərən gənclərin еlmi pоtеnsiаlının аrtırılmаsı, müxtəlif təşəbbüslərinin stimullаşdırılmаsı, elmə axının təmin olunması, asudə vaxtlarının səmərəli keçirilməsinin təşkili,əldə еtdikləri еlmi yеniliklərin müxtəlif kütləvi informasiya vasitələrində işıqlandırılması, onlara mеtоdiki, infоrmаsiyа yаrdımının göstərilməsi və s. həyata keçirlməsindən ibarətdir. Şurаnın fəaliyyətinə həmçinin, elmin respublika üzrə təbliğ edilməsi və Azərbaycan elminin dünya elminə inteqrasiyasının sürətləndirilməsi məsələləri daxildir.