“Fevralın 9-da keçiriləcək parlament seçkilərinə cəmiyyətdə böyük maraq var. Bunu namizədlərin təbliğat-təşviqat kampaniyalarından da görmək olur. Seçicilər namizədlərlə görüşə gedir, onları dinləyirlər. Əlbəttə ki, bu, seçicilərin öz səs verəcəkləri namizədi seçmək üçün mühüm amildir”. Bu fikirləri secki-2020.az saytına açıqlamasında AMEA Gənc Alimlər və Mütəxəssislər Şurasının İdarə Heyətinin üzvü, mexanika-riyaziyyat elmləri üzrə fəlsəfə doktoru Emin Bağırov bildirib.

“İnanıram ki, fevralın 9-da seçicilər dövlətini, xalqını sevən, yüksək peşəkarlığı və təşəbbüskarlığı ilə seçilən namizədlərə səs verəcəklər”, -  deyən E.Bağırov seçkilərə hazırlıq prosesinin şəffaf və ədalətli şəkildə aparıldığını diqqətə çatdırıb. O qeyd edib ki, hər bir namizəd üçün bərabər şərait yaradılıb.

Gənc alim deyib: “Əminəm ki, parlament seçkilərinin nəticələri də Azərbaycan xalqının iradəsini ifadə edəcək. Yeni formalaşacaq parlament sürətlə inkişaf edən ölkəmizin daha da güclənməsində mühüm rol oynayacaq”.