Tələbələrin “Gələcəyin alimləri” mövzusunda V Respublika virtual elmi konfransı keçirilir
May 13 , 2020 | 10:25 / Mühüm hadisələr
Oxunma ( 1468 )

Bakı Dövlət Universitetində (BDU) Fizika fakültəsinin təşkilatçılığı ilə tələbələrin ümummilli lider Heydər Əliyevin anadan olmasının 97-ci ildönümünə həsr edilmiş “Gələcəyin alimləri” mövzusunda V Respublika virtual elmi konfransı işə başlayıb.

BDU-dan AZƏRTAC-a bildirilib ki, konfransda rektor Elçin Babayev Azərbaycan Respublikası ərazisində koronavirus (COVID-19) xəstəliyinin yayılmasının qarşısının alınması istiqamətində universitetdə görülən qabaqlayıcı tədbirlər, xüsusi karantin rejimində tələbə və magistrantların təhsilinin davamlılığının təmin olunması haqqında məlumat verib. Pandemiya elan edilən koronavirusa qarşı dünyanın səfərbər olduğunu bildirən rektor Azərbaycanın hazırkı qlobal təhlükənin öz əhalisinə təsirini minimuma endirmək üçün effektiv tədbirlər həyata keçirən ölkələrdən biri olduğunu vurğulayıb. Rektor əlavə edib ki, universitetdə multidissiplinar tədqiqatlara üstünlük vermək, onları daim diqqətdə saxlamaq lazımdır.

Virtual konfransı açıq elan edən rektor E.Babayev iştirakçılara uğurlar arzulayıb.

Hazırkı çətin şəraitdə belə konfransların keçirilməsinin əhəmiyyətinə diqqət çəkən Fizika fakültəsinin dekanı, professor Məhəmmədəli Ramazanov fakültənin elmi uğurlarından, yüksək indeksli nüfuzlu jurnallarda çap olunma fəallığından, Tələbə Elmi Cəmiyyətinin fəaliyyətindən söz açıb.

Konfransa daxil olan materiallar barədə məlumat verən fakültə Tələbə Elmi Cəmiyyətinin (TEC) elmi rəhbəri, dosent Arif Orucov bildirib ki, konfransda 120-dən çox tezisin müzakirə olunması, o cümlədən plenar iclasda 8 iş, 4 bölmədə isə 112 işin məruzə edilməsi nəzərdə tutulur.

Fizika fakültəsinin magistrantı Nigar Gözəlova “Gümüş nanohissəciklərin Naftalan neftinin fotolüminessensiya xassələrinə təsiri” adlı təqdimatla çıxış edib. O, böyük müalicəvi əhəmiyyətə malik Naftalan neftinə müalicə zamanı mikrob və bakteriyaların məhv edilməsi məqsədilə gümüş nanohissəciklərin əlavə olunması nəticəsində yaratdığı dəyişikliklərin fotolüminessensiya üsulu ilə tədqiqi və spektrdəki dəyişikliklər barədə məlumat verib.

Sonra magistrant Möhsün Əlizadə “Protonların yüksək enerjili virtual bozonla toqquşması zamanı neytrino cütlərinin yaranması” mövzusunda məruzə edib. Plenar iclasda digər məruzəçi magistrantların çıxışları da maraqla qarşılanıb.

“Microsoft Teams” platforması üzərindən təşkil olunan konfransda BDU ilə yanaşı, respublikanın digər ali təhsil müəssisələrinin tələbələri də iştirak ediblər.

Diskussiya formatında davam edən konfransın ilk günü sualların cavablandırılması ilə yekunlaşıb.

 

Şurаnın fəaliyyətinin əsаs məqsədi AMEA üzrə fəaliyyət göstərən gənclərin еlmi pоtеnsiаlının аrtırılmаsı, müxtəlif təşəbbüslərinin stimullаşdırılmаsı, elmə axının təmin olunması, asudə vaxtlarının səmərəli keçirilməsinin təşkili,əldə еtdikləri еlmi yеniliklərin müxtəlif kütləvi informasiya vasitələrində işıqlandırılması, onlara mеtоdiki, infоrmаsiyа yаrdımının göstərilməsi və s. həyata keçirlməsindən ibarətdir. Şurаnın fəaliyyətinə həmçinin, elmin respublika üzrə təbliğ edilməsi və Azərbaycan elminin dünya elminə inteqrasiyasının sürətləndirilməsi məsələləri daxildir.