AMEA-nın Geologiya və Geofizika İnstitutunun Gənc Alim və Mütəxəssislər Şurasının tələbələr üçün təşkil edəcəyi “Gələcəyə addım” - geologiya və geofizika üzrə ümumrespublika olimpiadasına qeydiyyat pandemiya ilə əlaqədar iyulun 1-dək uzadılıb.

İnstitutdan AZƏRTAC-a bildirilib ki, müsabiqənin elmi təşkilat komitəsinin qərarına əsasən AMEA-nın 75 illiyinə həsr olunan olimpiada onlayn keçiriləcək.

Final mərhələsi iyulun 15-də “Microsoft Teams” proqramı ilə həyata keçiriləcək olimpiadanın ümumi mükafat fondu 2 min 200 manat təşkil edir.

Olimpiada ali və orta ixtisas təhsil müəssisələrinin III-IV kurs tələbələrinin, eləcə də I-II kurs magistrantların bilik səviyyələrini qiymətləndirmək, həmçinin gələcək peşəkar fəaliyyətlərində elmə üstünlük vermələrini stimullaşdırmaq məqsədilə təşkil olunur.