26 fevral AMEA Torpaqşünaslıq və Aqrokimya İnstitutunda “Xocalı  soyqırımı”nın 29-cu  ildönümü  ilə   əlaqədar zoom platforması üzərindən anım tədbir keçirilib. Tədbirdə İnstitut əməkdaşları Xocalı  soyqırımı qurbanlarının əziz xatirəsini bir dəqiqəlik sükutla yad ediblər.  İnstitutun Gənc Alim və Mütəxəssislər Şurası tərəfindən təşkil edilən tədbirdə AMEA Gənc Alim və Mütəxəssislər Şurasının sədri, f.ü.f.d Famin Salmanov da iştirak edib. AMEA Gənc Alim və Mütəxəssislər Şurasının sədri Famin Salmanov çıxış edərək təəssüf hissi ilə qeyd edib ki, Xocalı faciəsi ermənilərin Azərbaycan xalqına qarşı törətdikləri qətliamların ən qeyri-insani olanı və  dəhşətlisidir. Bu dəhşətli soyqırıma  hüquqi və siyasi qiymət ümummilli lider Heydər Əliyevin rəhbərliyi ilə 1994-cü ildə verilib və bu siyasət Prezident İlham Əliyev tərəfindən uğurla davam etdirilib. Dövlət müstəqilliyimizin və ərazi bütövlüyümüzün qurbanları olan və 44 gün  davam edən  İkinci Qarabağ müharibəsində qisası  alınan Xocalı şəhidləri daim qəlblərdə yaşacaq və xatirələri əziz tutulacaq.

 İnstitutun Gənc Alim və Mütəxəssislər Şurasının sədri, Fərid Mustafayev Xocalı soyqırımı – insanlığa və bəşəriyyətə qarşı cinayət olduğunu bildirib.Azərbaycanın Xocalı şəhəri sakinlərinin erməni silahlı birləşmələri tərəfindən vəhşicəsinə öldürülməsi Qarabağ müharibəsinin ən dəhşətli və tariximizə qanla yazılan səhifəsi oldu. F.Mustafayev qeyd edib ki, Xocalı soyqırımı nəticəsində 63-ü uşaq, 106-sı qadın, 70-i qoca olmaqla 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Düşmən gülləsindən 76-sı uşaq olmaqla, 487 nəfər yaralanıb, 1275 nəfər əsir götürülüb. Daha sonra çıxış edən institutun Gənc Alim və Mütəxəssislər Şurasının üzvləri Leyla Babayeva və Tərlan Yelmarlı 1992-ci il fevralın 25-dən 26-na keçən gecə Xocalıda baş verən hadisələrdən ətraflı danışaraq qeyd ediblər ki, Xocalı faciəsi 200 ilə qədər bir müddətdə erməni millətçilərinin və onların havadarlarının Azərbaycan xalqına qarşı apardıqları etnik təmizləmə və soyqırımı siyasətinin davamıdır. Erməni təcavüzkarlarının törətdikləri vəhşilik yaddaşlardan heç zaman silinməyəcəkdir.