Gənclərin elmi-tədqiqat işləri üzrə ixtisaslarını təkmilləşdirərək onları istiqamətləndirmək məqsədilə Geologiya və Geofizika İnstitutunda (GGİ) fəaliyyət göstərən “Gənc alim və mütəxəssislərin elmi seminarı” çərçivəsində elmi seminar keçirilib.
Tədbiri GGİ Gənc Alim və Mütəxəssislər Şurasının sədri Fatma Suleymanova giriş sözü ilə açaraq iştirakçıları ənənəvi seminarın gündəliyi ilə tanış edib. Bildirilib ki, magistrlərin edəcəkləri məruzələrin indiki geniş platformada müzakirəsi magistr dissertasiyalarının müdafiəsinə hazırlıq məqsədi daşıyır.
Sonra İnstitutda magistratura təhsili alan II kurs gənclərinin yerinə yetirdikləri dissertasiya elmi işlərinin nəticələrinə dair təqdimatlar dinlənilib.
Tədbirdə “Seysmologiya və geomaqnetizm” şöbəsinin böyük laborantı Yaşar Əliyevin, “Çöküntü hövzələrinin geokimyası və flüid dinamikası” şöbəsinin böyük laborantı Samir Zeynalovun və “Paleofloristika” sektorunun böyük laborantı Elşən Abdullayevin məruzələri maraqla dinlənilib, çoxsaylı suallar cavablandırılıb, həmçinin gələcək alimlərə apardıqları tədqiqatlarla bağlı tövsiyələr səsləndirilib.