Apr 20 , 2022 | 10:16 / Görüşlər
AMEA Gənc Alim və Mütəxəssislər Şurasının yeni layihəsi əsasında aprel ayında “mədəniyyət həftəsi” qeyd olunub. 18 aprelin Beynəlxalq Abidələr və Tarixi Yerlər Günü kimi qeyd olunduğunu nəzərə alaraq mədəniyyət həftəsi 18-22 aprel tarixlərində baş tutub. Bu münasibətlə aprel ayının 18-də Qobustan Milli Tarix-Bədii Qoruğuna gəzinti təşkil edilib. Növbəti gündə - aprel ayının 19-da isə müxtəlif institutların gənc alim və mütəxəssislər şuralarının sədləri və bir sıra üzvləri Nizami adına Milli Azərbaycan Ədəbiyyatı Muzeynin ekspozisiyasını ziyarət edib. Muzeydə gəzinti zamanı onları “İctimaiyyətlə əlaqələr və mətbuat” şöbəsinin müdiri, filologiya üzrə fəlsəfə doktoru Nəzmiyyə Yigitoğlu müşayiət edib. O, qonaqları muzeyin ekspozisiyası ilə tanış edərək müxtəlif eksponatlar, xatirə əşyaları və s. haqqında ətraflı məlumat verib. Qonaqlar da izahatda aktiv iştirak edib, Azərbaycan ədəbiyyatını əks etdirən zallar, eksponatlar ətrafında sual və fikirlərini səsləndirərək ekskursiyanın interaktiv olmasına çalışıblar.
Muzeyin zallarını gəzdikdən sonra ziyarətçilər Muzeyin baş direktoru, akademik Rafael Hüseynovla da görüşüblər. Görüş çərçivəsində akademik gənclərə günümüzün elmlə bağlı olan qlobal problemlərindən söhbət açaraq onlara öz tövsiyyələrini verib, hər zaman dəstək olmağa hazır olduğunu bildirib.
Sonda AMEA Gənc Alim və Mütəxəssislər Şurasının sədri, kimya üzrə fəlsəfə doktoru Elmir Babayev muzey gəzintisi haqqında təəssüratlarını bölüşmüş, qonaqlar adından təşəkkür və məmnunluqlarını bildirmiş, belə gəzintilərin davamlı olması haqqında da öz arzusunu dilə gətirmişdir.
