AMEA Gənc Alim və Mütəxəssislər Şurasının layihəsinə əsasən sədr və şura üzvləri Məhəmməd Füzuli adına Əlyazmalar İnstitutunda təşkil olunmuş “Şuşa Qarabağın incisidir” adlı sərgiyə baxış keçirmişlər. Sərgidə Azərbaycan Respublikasının Prezidenti tərəfindən müvafiq Sərəncamla 2022-ci ilin “Şuşa ili” elan edilməsi ilə əlaqədar AMEA Məhəmməd Füzuli adına Əlyazmalar İnstitutunda mühafizə olunan Şuşa şəhərinə aid sənədlər, Şuşada yaşayıb-yaratmış sənətkarların ədəbi irsinin əlyazma nüsxələri nümayiş etdirilir. Qonaqlara sərgi çərçivəsində bu dəyərli və tarixi əlyazmalar haqqında ətraflı məlumat verilib.

Daha sonra isə qonaqlara Hacı Zeynalabdin Tağıyevin təsis etdiyi Qızlar məktəbinin 100 illik yubileyi münasibətilə akademik Teymur Kərimlinin təşəbbüsü əsasında yaradılmış Hacı Zeynalabdin Tağıyev guşəsi təqdim edilib, burada nümayiş olunan kitablar, panolar, tarixi fotoşəkillər, geyimlər haqqında məlumat verilib. Gənclərlə belə görüşlərin vacibliyini vurğulayan AMEA Məhəmməd Füzuli adına Əlyazmalar İnstitutunun icraçı direktoru, filologiya elmləri doktoru Paşa Kərimov onlara öz tövsiyyələrini verib.

© Bütün hüquqlar qorunur. Xəbərlərdən istifadə edərkən www.gencalimler.az saytına istinad zəruridir.