AMEA-da 2 Fevral - Azərbaycan Gəncləri Gününə həsr olunmuş tədbir keçirilib
Fev 03 , 2023 | 02:09 / Mühüm hadisələr
Oxunma ( 475 )

Fevralın 2-də Akademiyanın Əsas binasının akt zalında AMEA-nın Gənc Alim və Mütəxəssislər Şurasının (GAMŞ) 2 Fevral - Azərbaycan Gəncləri Gününə həsr olunmuş tədbiri keçirilib.

Yığıncaqda AMEA-nın Gənc Alim və Mütəxəssislər Şurasının sədri, kimya üzrə fəlsəfə doktoru Elmir Babayev “AMEA-nın elmi gəncliyi: uğurlar və vəzifələr” mövzusunda məruzə ilə çıxış edib.

Məruzəçi bildirib ki, AMEA-da yüksəkixtisaslı və peşəkar gənc tədqiqatçıların hazırlanması istiqamətində mühüm addımlar atılıb. Gənclərin tədqiqat işlərinin nəticələri bu gün “Web of Science” və “Scopus” platformalarında indeksləşən jurnallarda çap olunur. E.Babayev vurğulayıb ki, Akademiyanın elmi müəssisə və təşkilatlarına 647 magistrant qəbul olub və onlardan 179 magistr təhsil aldığı müəssisələrin elmi işçiləri olaraq fəaliyyətlərini davam etdirirlər.

Gənc alim GAMŞ-ın elmlə təhsilin vəhdətinin möhkəmləndirilməsi siyasətinə uyğun olaraq fəaliyyətini genişləndirdiyini, orta məktəblərdə silsilə görüş və tədbirlərin təşkil edildiyini, AMEA-nın institut və təşkilatlarında “Açıq qapı” günlərinin davam etdirildiyini diqqətə çatdırıb. Asudə vaxtın səmərəli təşkili üçün il ərzində Gənc Alim və Mütəxəssislər Şurası və Gənclər və İdman Nazirliyinin birgə təşkilatçılığı ilə Lənkəranda “Gənc alimlərin yay düşərgəsi”, Mingəçevirdə “Gənclərin İnnovasiya düşərgəsi” və Qusarda “Gənc mühəndislərin yay düşərgələri” təşkil olunub.

Şura sədri əlavə edib ki, Müzəffər Ali Baş Komandan İlham Əliyevin rəhbərliyi ilə gerçəkləşən 44 günlük Vətən müharibəsində canı, qanı ilə mübarizəyə qatılan igid, mübariz gənclərlə yanaşı, elmi, zəkası və biliyi ilə AMEA-nın gənc alim və mütəxəssisləri informasiya müharibəsində də əzmkarlıqla mübarizə aparıblar. Haqq səsimizin müxtəlif dillərdə dünya mətbuatında və sosial şəbəkələrdə işıqlandırılmasında xidmət göstəriblər.

Elmir Babayev Qarabağın rəqəmsal dövrün tələblərinə uyğun yaşıl texnologiyalar əsasında yenidən qurulmasında, dünyaya enerji və transportasiya sənayesinə ölkəmizin verdiyi töhfələrlə dəstək olmaqda öz yeni yaradıcı elmi fikirləri, enerjisi və fiziki imkanları ilə əlindən gələni etməyə hazır olduqlarını bildirib.

Məruzəçi “Heydər Əliyev İli” çərçivəsində müxtəlif səpkili konfrans, seminar, dəyirmi masa, elmi-intellektual idman yarışlarının təşkilinin nəzərdə tutulduğunu diqqətə çatdırıb. Cari ildə GAMŞ-ın qarşısında duran vəzifələrdən danışan E.Babayev “Gənc tədqiqatçı” jurnalında müasir elmin tələblərinə cavab verən məqalələrin sayının artırılması, gencalimler.az saytının xarici dil interfeyslərinin təkmilləşdirilməsi, KİV-lə işin gücləndirilməsi, elmi-populyar çıxış və görüşlərin artırılmasının əsas vəzifələrdən olduğunu qeyd edib.

Elmir Babayev çıxışının sonunda AMEA rəhbərliyinə, xüsusən AMEA-nın prezidenti, akademik İsa Həbibbəyliyə gənclərin fəaliyyətini dəstəklədiyinə və yaradılan əlverişli iş şəraitinə görə minnətdarlığını bildirib.

https://science.gov.az/az/news/open/23790

 

Şurаnın fəaliyyətinin əsаs məqsədi AMEA üzrə fəaliyyət göstərən gənclərin еlmi pоtеnsiаlının аrtırılmаsı, müxtəlif təşəbbüslərinin stimullаşdırılmаsı, elmə axının təmin olunması, asudə vaxtlarının səmərəli keçirilməsinin təşkili,əldə еtdikləri еlmi yеniliklərin müxtəlif kütləvi informasiya vasitələrində işıqlandırılması, onlara mеtоdiki, infоrmаsiyа yаrdımının göstərilməsi və s. həyata keçirlməsindən ibarətdir. Şurаnın fəaliyyətinə həmçinin, elmin respublika üzrə təbliğ edilməsi və Azərbaycan elminin dünya elminə inteqrasiyasının sürətləndirilməsi məsələləri daxildir.