Aprelin 19-da Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) gənc tədqiqatçılar üçün növbəti ustad dərsi keçirilib. 

Tədbiri astronomiya üzrə fəlsəfə doktoru Ülkər Rüstəm giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Planetlər və kiçik səma cisimləri şöbəsinin" baş elmi işçisi, AMEA-nın müxbir üzvü Əyyub Quliyev "Günəş sisteminin kiçik göy cisimləri, kometlər" mövzusunda məruzə ilə çıxış edib.

Məruzədə kometlər, onların tarixi və klassifikasiyası, müvafiq kataloqlar barədə informasiya verilib. Kometlərin fiziki xüsusiyyətləri, orbitlərinin dinamikası və mənbəyi barədə qısa informasiya verən Əyyub Quliyev, daha sonra son onilliklərdə kometlərə göndərilmiş kosmik missiyalar, xüsusilə Rozetta proqramının yerinə yetirilməsi mərhələləri və proyektin nəticələrini şərh edib. Günəşətrafı kometlərin əmələ gəlməsi barədə hipotezdən söhbət açan alim, həmçinin naməlum X planetinin axtarışında kometlərin verə biləcəyi informasiyanın incələnməsindən və bu istiqamətdə aparılan elmi tədqiqatlardan danışıb. 

Seminar iştirakçıları tərəfindən maraqla qarşılanan məruzənin sonununda mövzu ətrafında geniş diskussiya aparılıb, suallar cavablandırılıb.

N.Tusi adına Şamaxı Astrofizika Rəsədxanası