May ayının 17-də Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) gənc tədqiqatçılar üçün növbəti ustad dərsi keçirilib. 

Tədbiri astronomiya üzrə fəlsəfə doktoru Ülkər Rüstəm giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Nəzəri astrofizika və kosmologiya" şöbəsinin müdiri, fizika-riyaziyyat üzrə fəlsəfə doktoru, dosent Balaəli Rəcəbov "Kosmologiyanın əsasları" mövzusunda məruzə ilə çıxış edib.

Məruzəçi seminarda ilk öncə kosmoloji kompakt obyektlərdən danışıb. Ağ cırtdanlar, neytron ulduzlar və qara dəliklər haqqında geniş məlumat verib, onların mənşəyi, təkamülü və xüsusiyyətlərini şərh edib. Alim qeyd edib ki, kosmoloji kompakt obyektlərin öyrənilməsində müasir nüvə fizikasının, müşahidə vasitələrinin, bərk cisimlər və elementar zərrəciklər fizikasının nəzəri və riyazı aparatından istifadə olunur. Bu obyektlərin tədqiqi Kainatın mənşəyi və təkamülünün öyrənilməsində ciddi rol oynayır.

Seminar iştirakçıları tərəfindən maraqla qarşılanan məruzənin sonununda mövzu ətrafında geniş diskussiya aparılıb, suallar cavablandırılıb.

N.Tusi adına Şamaxı Astrofizika Rəsədxanası