Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) gənc tədqiqatçılar üçün növbəti ustad dərsi keçirilib.

Tədbiri astronomiya üzrə fəlsəfə doktoru Ülkər Rüstəm giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın icraçı direktoru, professor Nəriman İsmayılov "Astronomik müşahidələrdə müasir detektorlar, onların xarakteristikaları və tətbiqləri" mövzusunda məruzə ilə çıxış edib.

Məruzədə həm klassik, həm də müasir siqnal detektorlarının quruluşu, iş prinsipi və əsas xarakteristikaları haqqında məlumat verilib. Ayrı-ayrılıqda CCD və CMOS detektorların ümumi və fərqli cəhətləri və müşahidə zamanı onlardan istifadə, müşahidə materiallarının işlənməsi prinsipi, nəticələrə təsir edən amillər haqqında danışılıb. Qaranlıq siqnal, siqnal/küy nisbəti kimi faktorların düzgün nəzərə alınması haqqında ətraflı informasiya verilib.

Seminar iştirakçıları tərəfindən maraqla qarşılanan məruzənin sonununda mövzu ətrafında geniş diskussiya aparılıb, suallar cavablandırılıb.

N.Tusi adına Şamaxı Astrofizika Rəsədxanası