AMEA-nın Memarlıq və İncəsənət İnstitutunun “Memarlıq abidələrinin qorunması və bərpa problemləri” şöbəsinin kiçik elmi işçisi,gənc alim Nigar Ramazanova   13 oktyabr 2026-cı il tarixində Türkiyənin İskəndərun şəhərində keçirilən “XX. Uluslararası Türk Sanatı, Tarihi ve Folkloru Kongresi / Sanat Etkinlikleri” adlı  Beynəlxalq elmi konfransda “Türk Mimarlık Sanatında Acemi Nahcivani” adlı məqalə  ilə onlayn formatda çıxış etmişdir.

Müəllifin məruzəsində  XII əsrdə Naxçıvan memarlıq məktəbinin formalaşması və inkişafında mühüm rol oynamış görkəmli Azərbaycan memarı Əcəmi Əbubəkr oğlu Naxçıvaninin yaradıcılığı tədqiq edilir. Araşdırmada memarın Azərbaycan memarlıq irsinin zənginləşdirilməsindəki xidmətləri, memarlıq kompozisiyalarında həndəsi qanunauyğunluqlara əsaslanan ornamentlərdən istifadə xüsusiyyətləri, eləcə də dekorativ-bədii həllərin özünəməxsus cəhətləri geniş şəkildə təhlil olunur. Tədqiqatda Əcəmi Naxçıvaninin yaradıcılığının yalnız Naxçıvanın memarlıq mühiti ilə məhdudlaşmadığı, eyni zamanda Şərq memarlıq ənənələrinin inkişafı kontekstində mühüm əhəmiyyət daşıdığı əsaslandırılır. Memarın yaradıcılığında konstruktiv həllərlə bədii tərtibatın vəhdəti, həndəsi naxışların memarlıq kompozisiyasına inteqrasiyası və memarlıq formalarının yüksək sənətkarlıqla işlənməsi onun üslubunun başlıca səciyyəvi xüsusiyyətləri kimi təhlil edilir.

Məqalənin beynəlxalq elmi konfransda təqdim olunması Azərbaycan memarlıq tarixinin görkəmli nümayəndələrindən biri olan Əcəmi Naxçıvaninin yaradıcılığının türk memarlıq sənəti kontekstində araşdırılması, milli memarlıq irsinin beynəlxalq elmi ictimaiyyətə tanıdılması və bu istiqamətdə elmi müzakirələrin genişləndirilməsi baxımından mühüm əhəmiyyət kəsb edir.