Azərbaycan Milli Elmlər Akademiyası Aşqarlar Kimyası İnstitutunda bir qrup gənc alimlər "Antimikrob xassələrə malik fizioloji fəal üzvi birləşmələrin kimyəvi və mikrobioloji sintezi və alınan maddələrin xüsusiyyətlərinin və tətbiq sahəsinin müəyyənləşdirilməsi" mövzusunda multidissiplinar tədqiqatlara başlayıb. Bu tədqiqatlar Azərbaycan Respublikası Prezidenti yanında Elmin İnkişafı Fondunun gənc alim və mütəxəssislər arasında keçirilən 3-cü qrant müsabiqəsi çərçivəsində qalib olan eyniadlı layihəyə uyğun həyata keçirilir. Layihənin rəhbəri Aşqarlar Kimyası İnstitutunun ""Aşqarların sintezi və təsir mexanizminin nəzəri əsasları" laboratoriyasının gənc elmi işçisi Sevinc Qocayevanın məlumatına görə, Layihənin məqsədi antioksidant və antimikrob xassələrə malik tetrapirimidintionlar və onların karboksilat törəmələrindən ibarət yeni üzvi maddələri sintez etmək, həmin maddələrin və onların çevrilmə məhsullarının xüsusiyyətlərini araşdırmaq, tətbiq sahələrini müəyyənləşdirməkdir.