Azərbaycan Milli Elmlər Akademiyasının (AMEA) prezidenti, akademik Akif Əlizadənin bu ilin fevral ayında imzaladığı müvafiq Sərəncamla əlaqədar AMEA-nın elmi müəssisələrinin kadr potensialını inkişaf etdirmək məqsədilə AMEA Geologiya və Geofizika İnstitutunda (GGİ) gənc alim və mütəxəssislər üçün mühazirələrin təşkil olunması nəzərdə tutulmuşdur. İnstitutun alimləri tərəfindən aparılan tədqiqatların nəticələrini özündə əks etdirən belə silsilə mühazirələr əvvəlcədən tərtib olunmuş plan üzrə elmi-tədqiqat müəssisəsində fəaliyyət göstərən “Gənc alim və mütəxəssislərin elmi seminarı”nda ilboyu keçiriləcəkdir.

Bu məqsədlə, ilk seminar “Müasir riyazi statistik üsulların geoloji-geofiziki tədqiqatlarda tətbiqi” mövzusu üzrə keçirilib. GGİ-nin Gənc Alim və Mütəxəssislər Şurasının (GAMŞ) rəhbəri, Yer elmləri üzrə fəlsəfə doktoru Orxan Abbasovun sədrliyi ilə aparılan seminarda İnstitutun “Layin qazhidrodinamika” şöbəsinin rəhbəri, AMEA-nın müxbir üzvü Qərib Cəlalov geniş məruzə ilə çıxış edib, gənclərin çoxsaylı suallarını cavablandırıb.