Milli Məclisdə cəmiyyətin çoxdan gözlədiyi, ikinci oxunuşda müzakirəyə çıxarılmış “Elm haqqında” qanun layihəsi ikinci oxunuşda öncə fəsil-fəsil, sonra bütövlükdə səsə qoyularaq  qəbul olunub. Elm və təhsil komitəsinin sədri İsa Həbibbəyli təkmilləşdirilmiş variantı barədə ətraflı məlumat verib.
Geniş fikir mübadiləsində deputatlar yeni qanun layihəsini müasir tələblərə və beynəlxalq standartlara cavab verən sənəd kimi yüksək dəyərləndiriblər. Vurğulanıb ki, layihə müəllifləri çox böyük işin öhdəsindən layiqincə gəliblər. Birinci oxunuşdan sonra sənədin əhəmiyyətli dərəcədə təkmilləşdiyi xüsusi qeyd olunub. Bildirilib ki, cəmiyyət həyatının bütün sahələrinin inkişafını özündə ehtiva edən bu qanun ölkəmizdə elmin nüfuzunun artmasına və elmi fəaliyyətin maliyyələşməsinə mühüm töhfələr verəcək.